Mensahe ni Iligan City Mayor Frederick W. Siao Kabahin sa Rally sa Katawhang Iliganon batok sa pagsaka sa presyo sa Kuryente sa dakbayan sa Iligan

Hon. Frederick W. Siao, Mayor of Iligan City

\

  By Jun Enriquez

Iligan City (Septembre 12, 2026) -  Sa tanang mga nitambong karong adlawa, sa mga organizers, participants, ug mga miyembro sa PIPOL POWER–Iligan Rally and March, ug labaw sa tanan, sa atong mga kaigsuonan nga Iliganon, maayong adlaw kaninyong tanan.

Ania ako karon sa inyong atubangan aron ipahibalo kaninyo nga nakasabot ko sa kabug-at nga inyong gibati tungod sa pagsaka sa presyo sakuryente. Naminaw ug nakasabot kami sa City Government of Iligan sa inyong mga kabalaka, ug karon gusto namong ipadayag ang among bug-os nga suporta niining panagtapok alang sa mas makatarunganon, transparent, ug accountable nga serbisyo sa kuryente alang sa tanang Iliganon.

Ang padayon nga pagsaka sa presyo sa kuryente usa ka problema nga dili nato angay pasagdan. Matag pagsaka sa atong bayranan sa kuryente direktang gibati sa atong mga pamilya, mga trabahante, mga negosyo, ug sa tibuok komunidad. Ang dugang nga atong gibayad sa kuryente, mahimo na unta nga usa ka kilo o duha ka kilo nga bugas, usa ka sud-an, o pagkaon na para sa pamilya.

Mga pinalangga kong Iliganon, ma-assure tamo nga wala nato pasagdi ang inyong mga tingog. Padayon kitang nakig-coordinate  ug nakigtambayayong sa mga concerned offices ug ahensya, sama sa ILPI, Energy Regulatory Commission, Department of Energy, PSALM, ug National Power Corporation, aron mapadayon nato ang atong paningkamot sa pagpangita og hustong mga solusyon sa atong problema sa kuryente.

Atong gisuportahan ang panawagan alang sa mas ubos ug makatarunganon nga power rates, klaro ug transparent nga mga bayranan, ug kasaligan nga serbisyo sa kuryente. Gisuportahan usab nato ang panawagan nga mahatagan og hustong pagtagad ang power requirements sa Iligan, lakip na ang atong panawagan alang sa 25-megawatt power allocation alang sa atong siyudad.

Isip siyudad nga nag-host sa dagkong Agus Hydroelectric Power Plants, atong gituohan nga ang mga Iliganon angay usab makabenepisyo sa atong mga energy resources. Mao nga padayon ang atong paningkamot nga masiguro nga ang atong mga pamilya, mga negosyo, ug ang tibuok siyudad makatagamtam og mas kasaligan nga suplay sa kuryente.

Ug karon, adunay maayong balita alang sa atong mga Iliganon. Gidawat ug gi-welcome nato ang desisyon sa Energy Regulatory Commission o ERC nga i-recalculate ang electricity prices alang sa August 2026 billing period, nga mahimong maghatag og angay nga adjustment o kahupayan sa atong mga konsumante. Mapasalamaton kita nga adunay aksyon nga gihimo, apan atong bantayanang pagpatuman niini aron masiguro nga ang angay nga relief tinuod nga maabot ug mabati sa matag Iliganon.

Apan dili pa kita mohunong dinhi. Ang atong panawagan nagpabilin—mas ubos, makatarunganon, ug kasaligan nga presyo sakuryente alang sa matag Iliganon. Padayon nato nga ipadayag ang atong mga kabalaka, padayon kitang mangayo og hustong aksyon, ug padayon kitang magkahiusa hangtod makita ug mabati gyud nato ang tinuod nga kahupayan sa atong mga bayranan. Kini nga lakang usa lamang ka sugod, dili pa ang katapusan sa atong panawagan.

Ang atong panawagan dili batok kang bisan kinsa. Kini usa ka panawagan alang sa atong katawhan alang sa patas nga serbisyo, makatarunganon nga bayranan, ug mas maayong kaugmaon alang sa Iligan. Gusto lang nato nga ang atong mga kabalaka paminawon ug ang atong mga panawagan tagaan og hustong aksyon.

Maong mga igsoon kong Iliganon, mangayo usab ko sa inyong tabang. Buhaton sa City Government of Iligan ang among bahin. Padayon kitang makig-coordinate ug makigtambayayong sa ILPI, ERC, DOE, PSALM, NPC, ug sa ubang concerned offices ug ahensya. Apan mas lig-on ang atong panawagan kung kita nga mga Iliganon magkahiusa. Ang inyong tingog, inyong presensya, ug inyong padayon nga pagpangayo og aksyon makatabang aron mas madungog ang atong mga kabalaka ug mas seryosong tagdon ang atong mga panawagan.

Sa tanan nga niapil niining rally ug march, gusto namong ipahibalo kaninyo nga wala kamo nag-inusara. Ang City Government of Iligan anaa kanunay sa inyong luyo. Padayon kaming maminaw sa inyong mga kabalaka, makigtambayayong sa mga concerned agencies, ug mangita og mga paagi aron maprotektahan ang kaayohan sa atong mga Iliganon.

Ang inyong tingog mao usab ang tingog sa atong siyudad.

Busa, magpadayon kita sa pagtinabangay ug pagbarog alang sa usa ka Iligan nga adunay kasaligan, makatarunganon, ug angay nga kuryente alang sa tanan.

Daghang salamat sa inyong pagbarog alang sa atong mga kaigsuonan.

Kanunay ania kami, ang City Government of Iligan, kauban ug katimbang sa atong katawhan. Maong atong isaulog ang atong panaghiusa, atong ipaabot ang atong mga tingog, ug atong ipadayon ang atong panawagan. Magpadayon kita, hinay-hinay apan sigurado, kauban ang usa'g usa. Daghang salamat, ug padayon, Asenso Iliganon! (Gipasa gikan sa CIO; Gisulat ug Gihan-ay ni Jun Enriquez, Digital-Mobile Journalist)